Da samma dabei

„Du Papa, gehma morgn ins Hockey?“

„I glaub du spinnst Maxl, mir san pleite und abstiegn. Des dur i ma nimma oh“

„Aba meine Freind genga ah hi“

„Des is mir wurscht, des Pamperlhockey schau i ned oh. Alle hamms uns damals ohglogn. Koa Schuldn hamma, alles bestens. Nix war`s, de seng vo mir koa Geld mer. So was hob i die letzten fuffzg Jahr ned derlebt, wie die uns ohglogn hom.“

„So alt bist ja no gar ned“

„Werd ja ned frech, sonst gibt`s a drum Schelln.“

„Etza spuil ma Londesliga, so schlecht is des ned“

„Hast des scho a mol gsegn, Maxl? Da dengst de spuiln in Zeitlupn. Na, ned mit mir.“

„Du warst ja no ga ned dabei“

„Na und, i koas ma vorstelln.“

„Da Gerike is Trainer und mitspuiln durda ah.“

„Da Gerike, ahja. Des war friehrer a guada Spuila. Da woast no ganz kloa, da bin i scho ganga. Da Sven mit de beiden Kanadier, des war a Reihn. Da hom de Gegner nur mit de Ohrn gschlackert. Aber des is hald ah scho vorbei. Sind etza ah scho olde Lackln“

„Da Gerike is aber erst 31, der kos scho no.“

„Nerv mi jetza ned, wir bleimma morgn dahoam. Da woas i wos Bessers mit meine 12 Euro zum ohfanga.“

„Morgn kost`s eh nur 6,50“

„Wolln`s des Leit wieda locka, de Schlawiner. Verlernt hammses imma no ned.“ „Na, des Londesliga is ned so teier. Jedes Spuil 6,50“

„6,50 is mir für so a Hobbytruppe in da Trainingsholle ah no z`vuil.“

„Des Spuil is ja in da großen Arena“

„Maxl, schlag da des aus deim Kopf, da stemma alloins drin und ärgern se grad.“

„100 Dauerkarten san eh scho weg, da geht`s bestimmt zua.“

„Jetzt loß ma mein Fried. Des gonze Geld hams damals nausghaut für de Kanadier und nachad wills koaner gwesn sei. Hättens der Jugend ma a Chancen gem. Aber na, de DEL muss hold sei, jetzt is da Dreck do. I hätt des ned braucht. Friehrer ging`s ah ohne de Stars und war trotzdem suppa. Nachad gab`s nur no de Eventfans“

„Beim EVR spuiln etza lauter junge Rengschburger, da brachst dann nimma meckern. Wennst koa Eventfan bist, koast ah mit mir higenga“

Alfons wird ungeduldig und erhebt das Wort.

„Wennst jetza ned staat bist, dann darfst morgn an ganzen Dog dahoam bleibn. Host mi?

Durch den Krach irritiert betritt Mutter Elfriede das Kinderzimmer.

„Mensch Alfons, was schreist Du denn den Maxl so an?“

„Ah, is nix. Männersache!“

„Na dann ist`s ja gut. Ach Alfons, was ich vergessen habe Dir zu sagen. Morgen kommen ein paar Damen aus unserer Tanzgruppe vorbei und wir veranstalten eine kleine Tupperparty. Hoffe, das macht Dir nichts aus? Ist halt jetzt leider etwas kurzfristig.“

„Passt scho Elfriede. Der Maxl und I, wir san eh ned do. Wir gänga ins Eishockey. Hamma scho ausgmacht, gell Maxl.“ 

„Frahle Papa.“